తిరుమల శ్రీవారి ఆలయం… ఏడుకొండలపై ఉందని అందరికీ తెలుసు. మరి ఆ ఏడుకొండలు ఎక్కేందుకు ఏడు మార్గాలు ఉన్నాయని ఎంత మందికి తెలుసు..? ఆ ఏడు మార్గాల్లో… ఏ దారి నుంచి వెళ్లినా… తిరుమల చేరుకోవచ్చు. ఆ మార్గాల గురించి ఇప్పుడు తెలుసుకుందాం. కలియుగ ప్రత్యక్ష దైవం వెలసిన ప్రముఖ పుణ్యక్షేత్రం తిరుమల. ఏడుకొండలపై కొలువైన శ్రీనివాసుడిని ఒక్క క్షణమైనా కళ్లారా చూస్తే చాలని భక్తులు పరితపిస్తుంటారు. రోజూ వేలాది మంది తిరుమలకు క్యూకడుతుంటారు. తిరుపతి చేరుకున్నాక… తిరుమల కొండకు వెళ్లేందుకు… బస్సులు, ప్రైవేట్‌ జీపులు, టాక్సీలను ఆశ్రయిస్తారు. కొంతమంది అలిపిరి, శ్రీవారిమెట్ల మార్గం నుంచి కాలినడకన వెళ్తుంటారు. ఇవి కాకుండా… తిరుమల వెళ్లేందుకు ఇంకొన్ని మార్గాలు కూడా ఉన్నాయి. అవేంటో చూద్దాం. ఏడుకొండలు ఎక్కేందుకు ఏడు మార్గాలు ఉన్నాయి. వాటిలో మొదటిది అలిపిరి. ఇది అందరికీ తెలిసిన దారే. తిరుమల వెళ్లేందుకు ప్రధాన మార్గం కూడా ఇదే. బస్సులు, ట్యాక్సీలు, ప్రైవేట్‌ జీపులు… అన్నీ అలిపిరి నుంచే వెళ్తాయి. కాలినడకన కొండెక్కేవారు మొదట ఎంచుకునేది కూడా అలిపిరి మార్గమే. ఎందుకంటే ఇది… తాళ్లపాక అన్నమాచార్య నడిచిన మార్గం. ఈ మార్గంలో త...